Игътибар: инвесторлар өчен мөһим сигнал керде
“Бүген Россия өчен истәлекле көн: Татарстанга бөтен дөньяга танылган компания килде”, - дип Идел буе федераль округында РФ президентының вәкаләтле илчесе Михаил Бабич 22 апрельдә суыткыч җиһазларны җитештерү буенча «Haier» заводының тантаналы церемониясендә әйтте. Яңа җитештерү Яр Чаллыда “Мастер” Кама индустриаль паркы (КИП) территориясендә урнашкан.
- Европа, Төньяк Америка, Азия, Якын Көнчыгыш һәм Африкада 24 җитештерү үзәге, биш R&D үзәге һәм бүлендек оешмалары булган Haier Group Россиядә беренче эшханәсен ачты. Компанияләр группасы нәкъ Татарстанны керү ноктасы булып сайлады. Бу чимал сәнәгате белән бәйләнмәгән беренче Россия-Кытай проекты булып тора. Татарстанның инвестицион үсеш агентлыгы Россия икътисады үсешенә үз өлешен кертә. 55 млн. доллар туры чит ил инвестиция җәлеп ителде. Яңа эш урыннары булдырылды: 2017 ел башына җитештерүдә 500 белгеч эшләчәк, 1200 кеше аутсорсинг аша җәлеп ителәчәк, ә бүген заводта 120 хезмәткәр эшли инде. Гади булмаган икътисади вакытта яңа завод ачышы Татарстанның инвесторлар өчен ышанычлы һәм перспектив партнер булуын күрсәтә. Бу инвесторлар өчен мөһим сигнал, - дип Татарстанның инвестицион үсеш агентлыгы җитәкчесе Талия Миңнуллина ышана.
Татарстан Президенты Рөстәм Миңнеханов, Михаил Бабич, «Хайер» Корпорациясе президенты Лян Хайшань, Яр Чаллы мэры Наиль Магдеев яңа җитештерүгә символик старт бирделәр.
- Киләчәк җитештерү өчен мәйданны сайлау очраклы түгел. Беренчедән, Кытай инвесторларын регион хөкүмәтенең актив позициясе, Татарстан базарында ачык уен шартлары һәм табышлы инвестицион сәясәт җәлеп итә. Икенчедән, Татарстан – Кама индустриаль паркы кебек зур сәнәгый үзәге булган икътисади үсеш дәрәҗәсе буенча ил регионнары арасында лидерларның берсе, - дип чарада Haier компаниясе генераль директоры Сун Чженьхуа билгеләде.